Türkmen halkynyň Milli Lideri Gahryman Arkadagymyzyň hem-de hormatly Prezidentimiz Arkadagly Gahryman Serdarymyzyň ägirt uly tagallalary bilen Berkarar döwletiň täze eýýamynyň Galkynyşy döwründe milli awtomobil sporty has hem rowaçlanýar. Ýylyň-ýylyna türkmen awtosportçularynyň abraýly halkara ýaryşlarda gazanýan üstünlikleriniň mysalynda hem muňa aýdyň göz ýetirmek bolýar.
Şu ýylda Russiýadan Mongoliýa uzan «Ýüpek ýoly—2024» rallisinde türkmen türgenleriniň gazanan goşa ýeňşi ýurdumyzda sportuň bu görnüşini rowaçlandyrmak babatda döredilýän giň mümkinçilikleriň aýdyň netijesidir. Ýaryşyň T2 görnüşi boýunça Türkmenistanyň Awtomobil sporty federasiýasynyň türgenleriniň ikinji we üçünji orunlara hem-de ralliniň «SILK WAY 2024» kuboklaryna eýe bolmaklary guwandyryjy ýagdaýdyr. Ýaşyl Tugumyzy ýeňiş bilen belentde parladan ussat awtosportçularyň arasynda welaýatymyzdan Didar Orazmedowyň hem bardygyny buýsanç bilen nygtamak zerur. Sürüji Maksatmyrat Daňatarowyň hem-de şturman Didar Orazmedowyň ekipažy awtorallide üçünji orny eýelemegi başardy.
Bu türgenler 2023-nji ýylda Kazan — Moskwa ugry boýunça «Ýüpek ýoly — 2023» awtorallisinde hem üçünji orny eýelemegiň hötdesinden gelipdiler. Russiýa Federasiýasynyň Astrahan — Moskwa şäherleriniň aralygynda geçirilen «Ýüpek ýoly — 2022» halkara ýaryşynda ralliniň T2 — ýolsuz ýerden ýöreýän ulaglaryň ýaryşlarynda çykyş eden bu türkmen ekipažy ýene-de ýeňiş münberiniň üç basgançagyny eýelemegi başarypdylar.
Didaryň awtosporta ykbalyny baglamagynda kakasy Orazmyrat aganyň göreldesi bar bolsa gerek. Halypa tälimçi, Türkmenistanyň Awtomobil sporty federasiýasynyň ýygyndy toparynyň agzasy Orazmyrat Orazmedow hem bütin dünýäde uly gyzyklanma döreden «Amul — Hazar», «Kazan — Aşgabat» awtorallilerine gatnaşypdy. Didaryň özi Gahryman Arkadagymyzyň başlangyjy bilen geçirilen «Amul — Hazar» awtorallisinde şowly çykyş edipdi.
Didar orta mekdepde okaýan döwürleri sport bilen meşgullanyp başlaýar. Ol ussat tälimçi Muhammet Nurmedowyň tälimçiliginde welosport boýunça türgenleşýär. Belki, ýokary tizlige bolan hyjuw onda şol mahallar dörändir. Soňra Didar Orazmedow Türkmenistanyň Bedenterbiýe we sport institutynda awtomobil sporty ugry boýunça bilim alýar. Häzirki wagtda ol Daşoguz şäherindäki 5-nji sport mekdebiniň instruktor-usulyýetçisi bolup zähmet çekýär. Abraýly halkara ýaryşlaryň menzillerinde ýurdumyzyň sport abraýyny barha ilerledýän, ýaşyl Tugumyzy belentde parladýan ezber türgene üstünlikleriň hemra bolmagyny arzuw edýäris.
“Daşoguz habarlary” gazetinde çap edilen
habarlar esasynda taýýarlanyldy.