Ýurdumyzyň gazanýan ýokary ösüş sepgitleriniň gözbaşynda hormatly Prezidentimiziň pähim-paýhasa eýlenen döwletli başlangyçlary, öňe süren durmuş-ykdysady ösüş we özgertmeler maksatnamalary durýar.
«Türkmenistanda 2019 — 2025-nji ýyllarda sanly ykdysadyýeti ösdürmegiň Konsepsiýasynyň» üstünlikli durmuşa ornaşdyrylmagy we oýlanyşykly döwlet syýasatyna laýyklykda, ýurdumyzda dünýäniň ösen tejribesini hem-de öňegidişliklerini nazara alyp, ýokary tehnologiýalara, düýpli nazaryýet bilimlerine we öňdebaryjy ylymlara esaslanan sanly ykdysadyýeti döretmäge aýratyn ähmiýet berilýär. Ykdysadyýeti üstünlikli sanlylaşdyrmagyň möhüm şerti ýurduň ykdysadyýetiniň dürli pudaklaryna maglumat- aragatnaşyk tehnologiýalaryny işjeň ornaşdyrmak arkaly döwlet hyzmatlarynyň ähli görnüşleriniň elektron görnüşde ýerine ýetirilmeginiň gazanylmagy we sanly hökümet ulgamynyň ornaşdyrylmagydyr. Dünýäde birinji onluga girýän ýurtlarda döwlet tarapyndan hödürlenýän hyzmatlary sanlylaşdyrmak maksady bilen durmuşa geçirilen ähli möhüm işler dört sany esasy tapgyrdan ybarat bolup, olar maglumat, interaktiw, tranzaksion, transformasion tapgyrlardyr.
Maglumat tapgyrynda ähli döwlet edaralary raýatlara hödürlenýän hyzmatlaryň, hyzmatlardan peýdalanmak üçin gerek bolan resminamalaryň sanawlaryny elektron saýtlar arkaly beýan edýär. Interaktiw tapgyry bolsa döwlet edaralary tarapyndan berilýän resminamalary elektron görnüşde sargyt we kabul etmek mümkinçiliginiň döredilmegini üpjün edýär. Tranzaksion tapgyrynda raýatlar üçin döwlet edaralarynyň elektron aragatnaşygy üpjün edilýär we raýat islendik hyzmatdan özüniň elektron otagynyň üsti bilen peýdalanyp bilýär, bu ugur üçin raýatlaryň şahsyýetini tassyklamagyň ygtybarly elektron usuly işlenilip düzülýär.
Şu tapgyrlaryň ählisinde esasy üns bermeli mesele, bu ulgamy sanlylaşdyrmakda ulanylýan tehnologiýalaryň kiberhowplara garşy durnuklylyk derejesini saklamakdan ybaratdyr. Bu ugurda döwletimiz tarapyndan öňe sürülýän başlangyçlar, amal edilýän meýilnamalar başy başlanan düýpli özgertmeleriň halk hojalygynyň ähli pudaklarynda giň gerimde ýaýbaňlandyrylmagy bilen, berkarar Watanymyzyň ykdysady kuwwatyny has-da pugtalandyrmaga, mähriban halkymyzyň durmuş abadançylygyny yzygiderli ösdürmäge gönükdirilendir.
Ýurdumyzda sanlylaşdyrmagy ýokarlandyrmakda, döwletiň ykdysadyýetiniň dürli ugurlaryny dünýäniň öňdebaryjy döwletleriniň derejesine ýetirmekde bimöçber tagallalar edýän hormatly Prezidentimiziň jany sag, belent başy aman bolsun, il-ýurt bähbitli belent tutumlary rowaçlyklara beslensin!
“Daşoguz habarlary” gazetinde çap edilen
habarlar esasynda taýýarlanyldy.