Mukaddes Garaşsyzlygymyzyň 34 ýyllyk baýramynyň öňüsyrasynda Köneürgenç etrabynyň Täze ýol geňeşliginiň çäginde täze, döwrebap Bitaraplyk şäherçesiniň hem-de awtomobil köprüsiniň açylmagy mynasybetli guralan toý dabarasy uly ruhubelentlige beslendi. Ýurdumyzyň obadyr şäherlerini abadanlaşdyrmak, çäk-dolandyryş düzümini kämilleşdirmek hem-de ilatyň ýaşaýyş-durmuş derejesini gowulandyrmak babatda amala aşyrylýan ägirt uly işleriň düýp mazmunynda Berkarar döwletiň täze eýýamynyň Galkynyşy döwründe adam hakynda edilýän aladalar öz beýanyny tapýar.
Ir säher bilen il sylagly ýaşulularyň ak patasy bilen täze awtomobil köprüsinden ilkinji ulaglar geçip başlady. Milli toý däp-dessurlarydyr aýdym-sazlar bilen täze köpriniň üstünden geçen gelnalyjyly ulag kerweni täze taryhy döwürde tirkeş gurap gelýän toýly günlerimizi alamatlandyrdy. 
Bitaraplyk şäherçesiniň açylyş dabarasy şäherçe geňeşliginiň edara ediş binasynyň öňündäki meýdançada guralan ýörite sahnada ýaýbaňlandyryldy. Dabara Türkmenistanyň Mejlisiniň Başlygy, Mejlisiň deputatlary, Türkmenistanyň Halk Maslahatynyň agzalary, syýasy-jemgyýetçilik guramalaryň wekilleri, edara-kärhanalaryň ýolbaşçylary, il sylagly ýaşulular, mährem eneler hem-de bagtyýar ýaşaýjylar gatnaşdylar. 
Welaýatyň medeniýet we sungat ussatlarynyň ýerine ýetiren aýdym-sazlary, tans-döredijilik toparlarynyň şowhunly çykyşlary dabaranyň göwün galkyndyryjy pursatlaryna öwrüldi. Il sylagly ýaşulularyň täze şäherçäniň açylyşy mynasybetli toý bagyny kesmegi dabara gatnaşyjylarda uly şowhun, ruhubelentlik döretdi. Hormatly Prezidentimiziň Daşoguz welaýatynyň Köneürgenç etrabynyň Täze ýol geňeşliginde täze, döwrebap Bitaraplyk şäherçesiniň açylyş dabarasyna gatnaşyjylara iberen Gutlagynyň okalmagy bolsa, bagtyýar ildeşlerimiziň göwünlerini ganatlandyrdy. Onda: «Bu gün Daşoguz welaýatynyň Köneürgenç etrabynyň Täze ýol geňeşliginde şatlyk-şowhuna beslenip, dabaraly açylýan täze, döwrebap Bitaraplyk şäherçesi hem ýurdumyzyň depginli ösüşleriniň özboluşly beýany bolup durýar» diýip, aýratyn nygtalýar. Döwrebap Bitaraplyk şäherçesiniň aýna ýaly tekiz, giň ýollary bilen seýil eden mahalyň 400 sany döwrebap ýaşaýyş jaýlaryna, 160 orunlyk çagalar bagyna, 420 orunlyk orta mekdebe, 200 orunlyk medeniýet öýüne, 500 orunlyk toý mekanyna, şeýle hem saglyk öýüne, söwda merkezine, hyzmatlar öýüne, Aragatnaşyk bölümine, seýilgähe gözüň düşüp, bu hakykata aýdyň göz ýetirýärsiň. 
Şäheriň döwrebap binadyr desgalarynda, ähli amatlyklary bolan ýaşaýyş jaýlarynda Berkarar döwletiň täze eýýamynyň Galkynyşy döwrüniň döredijilik, gurujylyk gudraty aýdyň şöhlelenýär. Şäherçäniň döwrebap binagärlik keşbinde ýurdumyzda obadyr şäherleri abadanlaşdyrmak, halkymyzyň bagtyýar durmuşyny üpjün etmek babatdaky syýasatyň işjeň durmuşa geçirilýändigini görmek bolýar. Häzirki wagtda «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasynyň», «Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş şertlerini özgertmek boýunça 2028-nji ýyla çenli döwür üçin rejelenen görnüşdäki Milli maksatnamasynyň» üstünlikli durmuşa geçirilmegi bilen, welaýatymyzyň obadyr şäherleri barha döwrebaplaşýar. 
Merdana pederlerimizden «Gurmak — döwletlilikden nyşan» diýen pähimiň hikmetine türkmen halkynyň Milli Lideri Gahryman Arkadagymyzyň we hormatly Prezidentimiziň ägirt uly tagallasy bilen bina edilen täze Bitaraplyk şäherçesiniň mysalynda aýdyň göz ýetirýäris.
 

“Daşoguz habarlary” gazetinde çap edilen
habarlar esasynda taýýarlanyldy.