Türkmenistanyň maýyplarynyň merkezi bedenterbiýe-sport klubunyň guramagynda «Awaza» milli syýahatçylyk zolagyndaky «Seýrana» myhmanhanasynda görüş taýdan şikesli türgenleriň arasynda küşt we şaşka boýunça Türkmenistanyň şahsy çempionaty hem-de toparlaryň arasynda Türkmenistanyň Kubogyny almak ugrunda ýaryş geçirildi. Onda ýurdumyzyň welaýatlaryndan we Aşgabat şäherinden gelen güýçli türgenler özara bäsleşdiler. Şunlukda, Türkmenistanyň Kubogyny almak ugrundaky ýaryşda welaýat maýyplar bedenterbiýe-sport klubynyň şaşkaçylar topary ikinji, küştçüler topary üçünji orunlary eýelediler. Türkmenistanyň şahsy çempionatynda erkek türgenleriň arasynda şaşka boýunça welaýat saglygy dikeldiş okuw-terbiýeçilik toplumynyň okuwçysy Allanur Ahmedow ikinji orna mynasyp boldy. Zenanlaryň arasynda şaşka boýunça şol toplumyň okuwçysy Aýnur Kakajanowa, küşt boýunça welaýat maýyplar bedenterbiýe-sport klubynyň türgeni Mahym Taganowa üstünlikli çykyş edip, Türkmenistanyň çempiony boldular. Ýaryşda ýeňiş gazanan türgenler Hormat hatlary we baýraklar bilen sylaglanyldy.
 

“Daşoguz habarlary” gazetinde çap edilen
habarlar esasynda taýýarlanyldy.