Magtymguly meýdançasynda ýaýbaňlandyrylan «Gündogaryň beýik akyldar şahyry Magtymguly Pyragynyň döredijiligi — parahatçylyk, hoşniýetlilik ýörelgeleriniň we umumadamzat gymmatlyklarynyň dabaralanmasy» atly aýdym-sazly dabara hem-de sergi Medeniýet we sungat işgärleriniň hem-de Magtymguly Pyragynyň şygryýet güni mynasybetli guralýan dabaralara özboluşly öwüşgin çaýdy. Welaýatyň medeniýet we sungat ussatlarynyň ýerine ýetiren, akyldar şahyrymyzyň sözlerine döredilen halk we estrada aýdymlary dabara baýramçylyk ruhubelentligini bagyşlady. Dabarada milli sungatymyzyň köpöwüşginliligi, baý many-mazmuny şöhlelenip, ol täze taryhy döwürde dana şahyrymyza goýulýan belent sarpanyň çeper beýanyna öwrüldi. Nurmuhammet Andalyp adyndaky döwlet sazly drama teatrynyň döredijilik toparynyň taýýarlan edebi-sazly çykyşlary dabaranyň mazmunyny baýlaşdyrdy. «Magtymguly, sözlerim saza goşsaň, uz bolar» diýen dana şahyryň goşgulary Berkarar döwletiň täze eýýamynyň Galkynyşy döwründe toý-baýramlarymyzda, gündelik durmuşymyzda bagtyýar halkymyzyň göwünlerini galkyndyrýar. Muňa dabaranyň dowamynda ýaňlanan aýdymlaryň mysalynda aýdyň göz ýetirmek bolýar. 
Dabarada baky Bitaraplygymyzyň, abadan ilimiziň, berkarar döwletimiziň şanyna ýaňlanan şirin aýdymlar bagtyýar halkymyzyň ýürek buýsanjyny alamatlandyrdy. Dabaranyň dowamynda welaýatyň birleşen dessançy bagşylarynyň ajaýyp döwrümizi, bedew bady bilen öňe barýan gözel Diýarymyzy taryplap ýerine ýetiren aýdymy halkymyzy baky bagtyýarlyga ýetiren türkmen halkynyň Milli Lideri Gahryman Arkadagymyzyň we Arkadagly Gahryman Serdarymyzyň adyna alkyş bolup ýaňlandy. 
Dabara reňbe-reň öwüşgin çaýan milli amaly-haşam sungatymyzyň täsirli sergisi baýramçylyk sahnasy bilen özboluşly sazlaşygy emele getirdi.
 

“Daşoguz habarlary” gazetinde çap edilen
habarlar esasynda taýýarlanyldy.