Milli medeniýetimiziň we sungatymyzyň galkynyşy
Milli senenamamyzda orun alan Medeniýet we sungat işgärleriniň hem-de Magtymguly Pyragynyň şygryýet güni mynasybetli dabaraly çäreler welaýatymyzda giňden ýaýbaňlandyrylýar. Geçirilýän baýramçylyk çärelerinde, dabaralarda, maslahatlarda bagtyýarlyk döwründe medeniýetiň we sungatyň guwançly ösüşlere, täze röwüşe eýe bolýandygy, halkyň köňlünde ýaşaýan beýik akyldar şahyryň pähim-parasada eýlenen şygryýeti dogrusynda buýsançly çykyşlara orun berilýär. Aýdym-sazlaryň, joşgunly tanslaryň üsti bilen milli medeniýetimiziň we sungatymyzyň waspy belentden ýetirilýär.
Welaýat häkimliginiň, Medeniýet müdirliginiň guramagynda Daşoguz şäherindäki «Görogly» meýdançasynda baýramçylyk dabarasy geçirildi. Oňa medeniýet we sungat, döredijilik işgärleri, teatr artistleri gatnaşdylar. Açyk asmanyň astynda döwre gurap oturan halk köpçüliginiň öňünde welaýatyň döredijilik toparlary, ussat aýdymçy-sazandalary, artistleri çykyş etdiler. Dabaranyň dowamynda  zähmetde tapawutlanan medeniýet işgärlerine TKA-nyň welaýat birleşmesiniň taýýarlan baýramçylyk sowgatlary gowşuryldy. 
Bagtyýar döwürde Gahryman Arkadagymyzyň, hormatly Prezidentimiziň tagallalarynyň netijesinde, işlemek, döretmek üçin ähli şertleriňdir mümkinçilikleriň döredilýändigi, bu günki gün gazanylýan üstünlikleriň, rowaç gadamlaryň waspynyň täze aýdymlarda, sazlarda, sahna eserlerinde, şygyrlarda giňden beýan edilýändigi nygtaldy. Şu ajaýyplyklaryň gözbaşynda duran, medeniýetimizi, sungatymyzy ösdürýän, täze üstünliklere ruhlandyrýan türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň janlarynyň sag, ömürleriniň uzak, döwletli işleriniň rowaç bolmagy arzuw edildi.
 

“Daşoguz habarlary” gazetinde çap edilen
habarlar esasynda taýýarlanyldy.